Kuva mu mwaka wa 2018 Guverinoma y'u Rwanda yemeje politiki yobkwisuzumisha kw'ababyeyi bose batwite bagakorerwa ibizamini bya Echographie bizwi nko guca mu cyuma, ibi bigakorwa mu gihe kitarenze ibyumweru 24 bya mbere byo gutwita nk'uko byasabwe na OMS ishinzwe ubuzima ku isi.

Mbere yaho, guca mu cyuma byakururaga cyane ababyeyi bafite amatsiko yo kumenya igitsina cyumwana batwite, bikitwa iby'abakire, bigakorerwa ku mavuriro makuru n'ayigenga. Mukansanga Denise, umubyeyi witegura kubyara bwa kabiri ahamya ko no kumenya igitsina cy'umwana hakiri kare ari ingenzi ati " Birafasha nko mu guhitamo imyenda n'ibindi bikoresho bizakenerwa umaze kubyara. Ntiwabyita iby'abagashize".

Abahanga mu by'ubuvuzi bo bagaragaza ko ibi bizamini bya Echographie bifasha cyane mu kumenya hakiri kare ibibazo umwana afite bikaba byakemuka, abatwitevimpanga nabo bakabimenya kare, bigafasha buri mubyeyi kwitegura ndetse byongera amahirwe ye yo kubyara neza. Dr Aimé Patrick NTIHABOSE uyobora ibitaro bya Rutongo mu karere ka Rulindo agaragaza ko mbere ibitaro byabaga byuzuye ababyeyi batwite abana bafite ibibazo bitandukanye byashoboraga gukumirwa no gukemuka hakiri kare ati " twatungurwaga n'ibibazo byinshi, tukabimenya umubyeyi aje kubyara, muri ako kanya rero ari ubuzima by'umubyeyi n'ubw'umwana biba biri mu kaga. Ariko ubu birimo gukemuka, ibibazo tubibonera kugihe tukabikemura cyangwa tukitegura hakiri kare." yungamo ati nicyo cyatumye tubasha gukuza umwana wavukanye amagarama 600 mu minsi ishize, n'ubu dufitemo undi uri muri icyo kigero, mbere byabara ari nk'ibitangaza cyangwa kwiyemeza ibidashoboka."

Mu gihe kandi ibi bizamini byakorerwaga mu bitaro by'uturere n'amavuriro yigenga hakomeje kugaragara imbogamizi ku babyeyi, Undi mubyeyi Martha Nikuze wo mu karere ka Rulindo ahamya ko bitamworoheye igiye yari atwite umwana we wa mbere ati " kujya kubona amafaranga y'urugendo, ayo kwishyura ibitaro ndetse n'ako kabaraga ku mugore utwite biragoye, nabikoze ku cyumweru cya 30, urumva nari nakerewe cyane". Kuri izi mbogamizi yongeraho ko no kugera ku bitaro bya Rutongo akoze urugendo rurenga isaha n'igice yasanze hari abandi benshi bategereje.

Muri Mutarama 2024 Umuryango Health Builders ufatanyije na Goverinoma y'u Rwanda wabonye izi mbogamizi mu Karere ka Rulindo bashyiraho ingamba yo gukwirakwiza imashini za Echographie mu bigo nderabuzima 22 byose byo mubkarere ka Rulindo.

Umuyobozi ushinzwe Imishinga muri Health Builders Elias SEBUTARE agaragaza ko ubu buryo bwitezweho kugabanya ikiguzi kikava ku mafaranga y'u Rwanda arenga ibihumbi Icumi bikagera nko kuri mafaranga maganatatu, kuko n'ikiguzi cy'urugendo kizaba kivuyeho ati " igiciro nacyo kizagabanuka cyane kuko bijya bikorwa n'abaforomo n'ababyaza babihuguriwe kandi" agaragaza ko uyu mwaka wa 2024 hari ikizere ko 80% y'ababyeyi bazabasha kwitabira izi serivizi, bakagera ku 100% umwaka utaha wa 2025.

Ubuyobozi bw'akarere ka Rulindo bwashimye ko ubuvuzi bukoresheje ikoranabuhanga bwahyikirijwe ibigo nderabuzima aribwo bugezweho bizafasha mu gusigasira ubuzima bw'umubyeyi n'ubw'umwana. Mayor MUKANYIRIGIRA Judith ati " ni uburenganzira bwa buri mubyeyi n'umwana. Niyo mpamvu twamaze no kunoza ibiganiro ku buryo mitiweli izajya yishyurira abanyamuryango bayo"

Izi mashini zimaze gukwirakwizwa mu bigo nderabuzima byose by'akarere ka Rulindo uko ari 22, kandi hakaba n'abakozi babiri babihuguriwe kuzikoresha, bagatanga raporo ku bitaro igihe babonye umubyeyi n'umwana atwite bafite ikibazo gisaba ubundi buvuzi bwisumbuye, kigakurikiranwa.